Box Office Frozen II a la chungnung fal

Box Office-ah Frozen II khum thei an la awm lo a, sum lalut hnem ber a la nih chhunzawm. Kar tawpa tlangzarh thar Knives Out chu sum lalut tam ber dawttu a rawn ni nghal a, Ford v Ferrari chu pathumna a la ni bawk.

North America mipuiten Elsa leh Anna an la hmu kham thei lo a, US Box Office-ah sum lakluh tam lamah khum thei an la awm lo.

Tlangzarh a nih aṭanga kar hnihnaah pawh a sum lakluh hi $85,977,773 zet a la ni a, hei hian Frozen II hlawhtlin zia a tilang. Khawthlang media ṭhenkhat chuan a kar hnihnaah chuan beisei a phak tawh lo nia tarlang awm nual mah se $mtd 85 chuang zet tlangzarh a nih aṭanga a kar hnihnaa la lalut thei film hi a tam lo hle thung.

Kristen Bell, Idina Menzel, Josh Gad, Jonathan Groff leh Ciarán Hinds-te'n an aw an thawhna Frozen II hian khawvel pumah $mtd 742.1 a lalut tawh a, $tluklehdingawn a lakluh har a rinawm loh.

South Korea-ah pawh an tlangzarh niin tualchhung theatre 88%-ah zet chhuah a nih avangin Public Welfare Committee, Seoul-a innghat NGO chuan complaint an theh­lut hial.  Tualchhung threatre hetiang zata chhuah a ni hi  Korea anti-monopoly laws bawhchhiatna a ni tih sawiin, an ram anti-trust act bawhchhiatna a nih thu sawiin PWC hian complaint an thehlut a ni.

Kar tawp Box Office-a sum lalut tam ber dawttu chu American murder mystery film Knives Out a ni a, theatre 3,461 aṭangin $26,769,548 a lalut a ni.

Daniel Craig, Chris Evans leh Katherine Langford-te channa Knives Out sum lakluh hi a tlem lo hle a, Frozen II sum lakluh a turu em avangin pahnihnaah a awm mai chauh a ni a, chart tam taka pakhatnate sum lakluh aiin a tam zawk.

Sum lalut tam ber pawh lo ni tawh Ford v Ferrari chu pathumnaah a la awm ve bawk a, $mtd 13 chuang a la lalut thei a ni.

Box Office top 10 chianah Knives Out bakah hian film thar lang a awm a, chu chu Queen & Slim a ni. He film hi romantic drama film a ni a, African- American pahnih, anmahni invenhimna lama police officer an thah palh avanga tlanchhiate chanchin a ni a, Box Office-ah hian palina a ni phak.

Chart hmasaa pangana A Beautiful Day in the Neighborhood chu pangana a ni bawk.

1    Frozen II                $mtd 85

2    Knives Out            $mtd 26

3    Ford v Ferrari        $mtd 12

4    Queen & Slim        $mtd 11.8

5    A Beautiful Day    $mtd 11.7

    in the Neighborhood

6    21 Bridges            $mtd 5

7    Playing with Fire    $mtd 4

8    Midway                $mtd 3

9    Last Christmas    $mtd 2

10    Joker                $mtd 1.9