11th Ṭhazual Award perform turte an bon dawn; Gospel artist inlan tur zingah J. Lalrosanga tel

Ṭhazual Award vawi 11-na chu November 8, 2025 zanah neih a ni leh dawn ta. Nomination pawh puan fel tawh niin, award sem zana perform turte pawh an hriat ta. Artist perform turte aṭangin award show pawh kal a tichakawm zual nghal hle.

11th Annual Ṭhazual Award-ah hian Gospel huangah nominee zinga tel pathum Zorema Khiangte, JH Peka bakah Icon star, Zoram mipui ngaihven ber zinga mi J. Lalrosanga te an inlan dawn.

Anni bakah hian tunlai band ṭha leh lar pahnih Evenflow leh Lilac & Jack-te'n mipui an rawn awi thei dawn a, an chetla hmuh a nghahhlelhawm tawh hle. Evenflow hian kum 2023 khan 'Band of the Year' award an lo dawng tawh a, Lilac hian nikum khan 'Best female artist' a lo dawng ve tawh bawk. Hei vang ringawt pawh hian an perform en a chakawm lo thei lo a ni.

Inlan tur zingah performance hmuhnawm thei tak, Mary Dawngi kan hmu leh dawn a, ṭhiang zai nghahhlelhawm em em Saka & Bzi leh Hmangaihi & Ruatpuiite zai leh chetla hmuh tur a awm dawn bawk. Hmanni lawka khiang awi ta, Agela leh Lesky Hype-te an inlan dawn a; social media lama zai mawi tak tak pholang ṭhin Nanaua Hmar chenin kan hmu thei dawn a, mit leh beng a tlai dawn tih a chiang. August 5-a kan thlah tak Mizo Dance Camp ten, MDC dintu Alan Rinawma tribute pualin lam hmuhnawm tak an entir dawn bawk.