Mizo action movie 'Hnam Hmelma' tlangzarh dawn

Mizo action movie hmuhnawm leh pui tak, cTV Studios Production kutchhuak, 'Hnam Hmelma' chu zanin hian Vanapa Hall-ah tlangzarh a ni. Film OST hi rock band ṭha, 'The Prophets' in an sa a, Mamoia Colney YouTube channel-ah dah chhuah a ni tawh bawk.

'Hnam Hmelma' script writer hi DoP Lalawmpuia (Lushai Rider) a ni a, OST pawh a phuah a ni bawk. Director hi film chan leh siam lamah sulhnu ngah tak Adama a ni. Kumin July thla aṭang khan shooting an nei ṭan a, September thla tawpah an zo a ni. A changtu zingah film lama sulhnu nei ṭha, Mizo Best Male Actor nilai Maruata Royte bakah Adama leh Nunui Rualhleng te an tel a, a tam zawk erawh mi thar an ni. Biker ṭha Rsa Bawihtlung, Mafela Ralte leh Pmafa te bakah Zira PC adventure sports lama larte an inlan dawn bawk. MZPF(Mizoram Parkour and Free Running) ten fight scene zawng zawng choreography an zirpui bakah an inlan ve bawk.

Action hlang movie a ni a, chhungkaw member tin ten tim miah loa en ho theih tur movie him a ni bawk. Zanin vek hian AiduPlay leh Lersia Play-ah en theiha chhawp chhuah a ni nghal bawk ang.