Zaninah 11th Ṭhazual Award sem dawn

Mizorama rimawi award ngaihven leh ngaihhlut hlawh, Zonet-in kum 2015 aṭanga a buatsaih, Ṭhazual Award vawi 11-na chu zanin hian R. Dengṭhuama Hall-ah semna neih a ni leh dawn. Zanina hun hman tur hi mipui tan chhim theih a ni dawn a, a hmunah ticket Rs 100 in lei tur a awm dawn a ni. Zonet YouTube channel-ah member-te tan live-a en theih a ni bawk ang.

11th Ṭhazual Award sem turah hian Lengzem huangah 'Best New Artist' category aṭangin tunlai zaithiam thawm nei lian leh huhang ngah, Youth Icon aṭanga mipuite hriat hlawh Lalsangliana, J. Lalrosanga leh Samson Vanchhawng te an awm a, tunge dawng tur hriat a chakawm tawh hle. Hei bakah Lalsangliana leh J. Lalrosanga te hi 'Best Male Artist' huangah awm dun lehin an in su tawk chho dawn hle niin a lang.

Zaninah tunge award hum haw hnem ber dawn tih pawh hriat a chakawm hle. Lengzem huangah tunlai zaithiam zinga thawm nei lian tak mai; aw mawi tak nei Bzi Tochhawng chu nomination hmu tam ber niin nomination pali a hmu a; Lil Kiki, Ngura Sailo, leh K.Hminga ten dawtin pathum ṭheuh an hmu bawk. Nikum lamah khan Lengzem huangah hian award pakhat aia tam hum haw thei an awm lo thung.

Gospel huangah artist zinga thawm nei lian Zorema Khiangte in nomination hmu hnem berin paliah a hmu a, Lengzem aṭanga Gospel lama inlet ta, JH Peka'n dawtin pathum a hmu ve bawk; JH Peka leh Zorema Khiangte hi 'Song of the Year' ah an lang dun ve ve a, tu zawk nge dingchang dawn kan hre thuai dawn e. Nikum khan Gospel huangah Jonathan Lianhna che ṭha berin award pathum a hum hawi thei a ni.

Perform tur zingah ngaihven hlawh Icon star, J. Rosanga pawh inlan dawn a, mahse, mipui te'n kan lo hmuh ṭhin kha a ni tawh dawn lo. Lengzem aṭangin Gospel huangah a zuang lut tawh a, Gospel hla a sak hnua stage lian a perform lehna hmasa ber tur a ni dawn a, a fans lam pawhin kan hmu chakin kan nghahhlel hle ngei ang. Ani bakah tunlai zaithiam lar, an music video thar ngaihthlak hlawh tak mai Ruatpui& Hmangaihi bakah Mary Dawngi, leh Lesky Hype x Angela te kan hmu thei dawn, R. Dengṭhuama Hall-ah thawm a ring leh dawn.

Mizo rimawi khawvela zaithiam kan neih ṭhat leh thawm nei lian tak takte zaninah an chetla kan hmu thei dawn a, hei vang hian show neihna hmun ngeia chhim a inchhirawm dawn lo. Zanin chu R. Dengṭhuama Hall lamah inhmu leh dial ang u aw.