Zarkawt KṬP Female Voice-te'n album tlangzarh

Zarkawt KṬP Female Voice-te chuan Pathian fakna hla 10 awmna acapella album 'Kan fak che Halleluia' tih chu Thawhṭanni zan khan an tlangzarh.

Thawhṭanni zan Zarkawt KṬP inkhawmah Zarkawt KṬP Leader Dino Laldinpuia Chhangte chuan tlangzarhin, Zarkawt KṬP hnen aṭang hian a duh apiang tan lei theih turin an buatsaih a ni.

Zarkawt KṬP Female Voice-te hian 2016 aṭang khan album hi an buatsaih ṭan tawh a, member 19 awmin anni hi acapella-a zai ṭhin an ni a, an album tharah pawh hian an rawngbawlna neih tawhnaa an hla sak ṭhin- hunpui mil hla hrang hrang an dah.

An album-a hlate hi an member-te arrange leh lehlinte a ni hlawm bawk. Mizo zaipawlah hian acapella hlang awmna album tichhuak pahnih an awm tawh a, anni hi a pathumna an ni chiah a, hmeichhe hlang anga acapella album siamah phei chuan a hmasa ber an nih a rinawm.