Dua Lipa album nakkumah
Hman ni lawka Grammy award sem taka 'Best New Artist' leh 'Best Dance Recording ("Electricity")' hawntu, English singer Dua Lipa chuan nakkum lamah a album thar LP 'Future Nostalgia' tih chu tihchhuah a tum.
Halloween nia a tihchhuah tak a single 'Don't Start Now' chu he a album thar tur zinga mi hi niin, a album tihlar nan hian Europe lamah tour neih nghal a tum bawk. Nakkum April 26 aṭangin Spain-ah tour ṭan nghal a tum a, July 19-ah Ireland-ah khar a tum a ni.
Dua Lipa album thar tur hi genre pahnih inpawlh, disco leh pop lam hawi a ni dawn. "Music-a hmasawnna ka neihna turin leh mahni inchophurna turin album thar hi ka siam a ni," tiin Dua Lipa chuan a sawi. Hmanni lawka Mumbai-a neih, 'OnePlus Music Festival'-ah khan Dua Lipa hi a zai a, mipui lawm a hlawh hle. 'King of Bollywood' an tih hial Shahrukh Khan nena an thlalak dunnate pawh, a instagram lamah a pho chhuak a ni.
A album thar tur title pawh hi IG-ah dangdai takin a tarlang a, a thlalak a post caption-ah a album thar tur hming hre duh tan a thlalak chu 'swipe' tura tiin, thlalak pahnihnaah a banah 'Future Nostalgia' tih hi a lo ziak a ni.