Favorite New Music-ah Katy Perry 'Bandaids'

Billboard poll-a music fan-ten kar liam ta chhunga music chhuak thar zinga an duh bera an thlan chu Katy Perry single thar, 'Bandaids' a ni.

Rosalía, Hilary Duff, Kehlani leh artist lar dang eng emaw zatin hla thar an tihchhuah karah, 'Bandaids' hian vote tla aṭanga 44% a hmu pha a ni. He hla hi Perry-i'n actor Orlando Bloom nena an inṭhen hnua hla a tihchhuah hmasa ber niin, inlaichinna a tawp hnu pawha hma lam pan zel tura beih a ngaihzia a tarlang a ni. Kumin April thla aṭang khan Lifetimes Tour nei ṭanin, European leg a zo tawh a, tun thla tawp lamah China lamah tour hi a chhunzawm ang. Full length studio album a tihchhuah hnuhnung ber chu '143' niin 2024 khan a chhuak a, Billboard 200 chart-ah No 6-ah a lang pha.

Kar liam taa hla chhuak thar zingah Rosalía 'Lux' chu fan-ten an duh pahnihna niin vote tla aṭangin 37% a hmu ve bawk. Pathumna Hillary Duff 'Mature' chuan vote 9% hmuin Kehlani 'Out the Window' chuan 2% hmuin palinaah a awm.