HYBE sum lak luh a pung

South Korean multinational entertainment company, khawvel huapa Kpop band lar tak tak chhawp chhuaktu, HYBE chuan Thawhṭanni khan 2025 third-quarter financial statement a tichhuak a, an sum lak luh hi ₩ tld 727.2 (USD tld 1.37) zet a tling. Nikum hemi hun nena khaikhina an sum lak luh punna hi 37.8% a tling pha. Quarter hmasaah khan ₩ tld 726.4 a la lut pha bawk.

Company sum lak luh zinga 66% hi direct engagement - artist album sale, world tour leh live event aṭanga hmuh a ni a, ₩ tld 477.4 a tling. BTS member Jin solo tour bakah Tomorrow X Together leh Enhypen ten global tour an neih aṭangin an thawh hlawk hle a, ₩ tld 245 zel an lak luh pui thei a ni. Hetih lai hian album sales erawh a tlahniam thung.

HYBE hnuaiah hian Kpop group, khawvel huap pawha hriat lar tak tak eng emaw zat an awm. BTS, Seventeen, TXT, Enhypen, Le Sserafim, New Jeans, &Team, Boynextdoor, TWS leh Illit te an awm a, kumina debut Cortis an tel bawk. Heng group hrang hrangte hi sub-label hrang hnuaiah an awm ve leh bawk a ni.