Michael Jackson biopic trailer-in record siam nghal

Khawvel rimawi huanga hriat reng tawh tur, 'King of Pop' Michael Jackson chanchin film-a siam chu trailer tihchhuah a nih aṭanga darkar 24 chhungin entu ngah lamah record thar a siam nghal. Trailer hi tihchhuah aṭanga darkar 24 chhung lekin view maktaduai 116.2 a nei tling a, biopic trailer tihchhuah tawha viewer ngah ber record a siam tih analytic firm WaveMetrix chuan a tarlang.

MJ biopic siam hi Queen frontman Freddie Mercury biopic 'Bohemian Rhapsody' pawh lo produce tawhtu, Graham King kutchhuak leh bawk niin, Antoine Fuqua direct a ni. MJ lemah hian a unau fa, Jaafar Jackson a chang a, an hmel leh hmaifang pawh a inang hle a ni. Biopic hi nakkum 2026, April 24-ah theater-ah pekchhuah hman tum a ni.