Billboard 200: No 1-ah 'The Life of a Showgirl' a zawnin kar nga awm ta

Billboard 200 album chart-ah Taylor Swift album thar ber, 'The Life of a Showgirl' a chungnung zel a, kar nga chhung a zawnin No 1-ah a awm ta.

'The Life of a Showgirl' hian kar liam ta chhungin equivalent album unit 120,000 a neih belh leh a; mahse, a kar hmasa lam aiin 18% in a tlahniam ve tawh thung. He album hi kumin 2025 chhunga Billboard 200 chart-a kar nga chhung No.1 ni thei pahnihna niin, Morgan Wallen album 'I'm the Problem' kha a zawnin kar riat chhung chart chung berah a lo awm ve tawh bawk. Swift hian a album tihchhuah hnuhnung ber dawttu, 'Tortured Poets Department' hmang khan chart hi kar 12 chu a lo thunun tawh a, kha album kha a zawn loin kar 17 chhung No.1 a ni thei a ni.

K-Pop Demon Hunter 'Soundtrack' chu a dinhmun ngai, pahnihnaah a la awm nghet zel a, kar hmasa chhung khan equivalent album unit 84,000 a neih belh leh a ni. No.3-ah he spot aṭanga nek chhuah hleih theih loh Morgan Wallen 'I'm the Problem' a la awm chhunzawm ve bawk.

Palinaah Florence+The Machine album thar, kar hmasaa tihchhuah 'Everybody Scream' chu langin, album chart-a top 10 a lang thei album panga an neihna a ni. Tyler, The Creator album 'CHROMAKOPIA" chu 117-na aṭangin equivalent album unit 51,000 neih belhin top 5 ah a invawrhkai bawk a ni.