Zaninah 'Nozomi' tlangzarh dawn

Mizo film thar, Lifeway Production kut chhuak, 'Nozomi' chu zanin hian Vanapa Hall-ah tlangzarh a ni dawn.

'Nozomi' hi romantic drama a ni a, nun beidawnna kara beiseina pholang thei film a ni. A film hming hi Japanese ṭawng a ni a, Mizo ṭawng chuan 'Beiseina' tihna a ni. Mi pakhat, beidawng, lungawi lo leh mahni indemna a khatin a nun kawng zawh chhoh dan leh chumi kawnga harsatna, hlimna, hmangaihna leh lungngaihna thlenga a tawh chhoh dan chanchin a ni.

Film lama sulhnu nei ṭha tak, zaithiam ni bawk Andrew Laltlankima leh Champhai nula zaithiam, Laldinsangi te an chang.Anni bakah Lesky Hype leh Sawma Chawngthu pawh an inlan bawk a ni. Director Zochhingpuia, director of photography Sailo Freddie niin, script writer hi Nuna Hrahsel a ni. Vanapa Hall-a tlangzarhnaa en duhte tan a hmunah ticket Rs 100 man lei tur a awm ang.