The Game Awards Prime video-ah stream dawn

Kumtina neih ṭhin, The Game Awards chu kumin December thla hian neih a ni leh dawn a, game journalist Geoff Keighley produce leh host ṭhin he award show hi Amazon Prime Video chuan a pe chhuak dawn a ni.

Kum 2014-a award show neih ṭan a nih aṭangin YouTube, Twitch, X, TikTok leh China platform hrang hrangah pek chhuah ṭhin a ni a, kum kaltaa award show platform hrang hranga an pek chhuah khan thlirtu mtd 154 a nei pha. Kumin show hi Amazon Prime Video-ah live stream a ni dawn a, YouTube leh Amazon enkawl Twitch-ah pawh pek chhuah a ni ang. Game Awards hi Peacock Theater, Los Angeles-ah December 11 hian neih a ni dawn a, kum khat chhunga game ṭha leh a siamtute chawimawina hlan an ni dawn. Show-ah hian game world premiere, game thar lian tham puan, leh musical performance a awm dawn bawk.