Leitlangpui Music Festival vawiinah a ṭiak dawn ta

Kawmzawl, Pukpui-a hman mek, Leitlangpui Music Festival (LMF) chu a ṭiak dawn ta. Ni thum awh festival hi Ningani khan health & family welfare minsiter, Lalrinpuii chuan hawngin, programme benglut leh mit titlai tak tak chhawp chhuah niin zan lamah concert nuam tak buatsaih nghal a ni. He hunah hian zaithiam lar tak takte an inlan.

Festival chhunga thawm nei lian ber tih theih, 'Band Contest' chu nimin khan neih a ni a, chawhnu dar 4.45 aṭanga hun hman ṭan niin band ṭha tak tak an inel. Band inelna neih a nih bakah guest band pahnih 'Be Run Over', leh 'Mood Station' te perform hmuhnawm tak en tur a awm bawk. Band contest-a pakhatna hian Rs nuai 3, pahnihnain Rs Nuai 1 leh pathumnain Rs 50,000 an dawng a, band inelna huanga sum chevel tamna a ni pha.

Leitlangpui Music Festival hi vawiinah kut kharna hun hman a ni dawn a, a hmuna kal hman lote tan Bbyanimals YouTube Channel lamah live stream in en theih a ni bawk. Festival chhung hian mipui dawr theih turin stall hrang hrang siam a ni. Vawiina a kharna hun siamah zaithiam eng emaw zat an inlan leh dawn a ni.