Zaninah 'Lalruanga: The Resurrection' tlangzarh dawn

Mizo thawnthua dawi chungchang kan sawi apianga a hming kan lam rik ṭhin, dawithiam fing leh ropui Lalruanga chanchin zulzuia siam 'Lalruanga: The Resurrection' movie chu zanin hian Vanapa Hall-ah tlangzarh a ni dawn.

Zangkaki leh Lalruangate inbeihna, kum tak tak a liam hnua tawp mai loa an thlahte hmanga rawn inlar thar leh chanchin a ni dawn a, a tihmuhnawm tur hian tunlai thiamna ril tak CGI leh VFX pawh a tam thei ang ber hman a ni bawk. Film hmuhnawm tak chhawp chhuah a nih theihna tur hian pros-production pawh kum khat chhung buaipui a ni a, a hmuhnawm ngei pawh a rinawm.

Film hi Diffusion G Production kutchhuak niin VFX leh CGI artist thiam tak tak, international project pawh lo khawih fo tawhte sulhnu kan hmu thei dawn a ni. Tlangzarh a nih hnuah hian Lersia Play-ah en theiha chhawp chhuah nghal a ni dawn a, streaming platform lamah hian English leh Hindi subtitle dah tel a ni dawn bawk.