Conductor Zara en theih a ni ta

Mizo mipui tana film en tur ṭha tak tak chhawp chhuah sak ṭhintu, In House Production kut chhuak thar ber, 'Conductor Zara' chu Zirtawpni liam ta zan khan LR Sailo, Bhupen Hazarika National Awardee chuan a tlangzarh. Film-ah hian Mizo actor kan neih ṭhat, Papuia Pachuau-in main role changin a hmuhnawm leh hle. Mizo Romcom movie hlimawm hi Lersia Play ah a en theih a ni.

In House Production kut chhuak thar berah hian Papuia bakah changtunu hmel thar Emma Hauhnar kan hmu a, ani bakah Vaki Casting Call neiha Top 10 zinga mi an lang bawk.

'Conductor Zara' siam chhung hi a rei lo a, October 14 aṭangin shooting nei ṭanin, November ni 14-ah release a ni. Director Drew Pachuau chuan siam chhung a rei loh avangin an uluk lo tihna a nih loh ṭhu a sawi a, "Pre production kan uluk a, engkim inpeih sâ thlap zela kan ruahman avangin shooting a rei lo, production leh post production a kalkawp bawk. Shooting zawh rualin 2nd Editor in a edit nghal zel a, kan shoot zawh meuh chuan editing a zo ve nghal" a ti a, insawrbing taka film siam chuan hun sen rei a ngai ngai lo, a ti.