Tom Cruise hnenah Oscar award hlan a ni ve ta

Lemchan khawvela chawimawina ngaihhlut tak, 16th Governor Award chu Pathianni khan Ray Dolby Ballroom, Ovation Hollywood-ah sem a ni. He hunah hian action movie hmuhnawm tak tak min hmuhtir ṭhintu, Tom Cruise hnenah a vawi khatna atan Oscar hlan a ni ve ta.

Governor Award hi Academy of Motion Picture Arts and Sciences (AMPAS) siam tho niin, category pathum - Academy Honorary Award, Jean Hersholt Humanitarian Award, leh Irving G. Thalberg Memorial Award hmangin lemchan khawvela thawh hlawkte hnenah hlan a ni ṭhin. A tirah chuan Academy Awards ceremony-ah hlan an ni ṭhin a, mahse a hnuah erawh a hranin hun an buatsaih ta a ni.

Tom Cruise hnenah hian 'Honorary Oscar' award hlan niin, ṭum li ngawt nomination-ah lo lang tawh mah se dawng zingah a tel pha ngai lo thung; mahse, kuminah erawh film industry tana a thawh hlawk em avangin chawimawina dawng tur hian thlan a ni ve thei ta a ni. Ani bakah hian mi dang pathum hnenah Honorary Oscar hi hlan a ni bawk.

Academy of Motion Picture Arts and Sciences kaltlanga Governor Award semah hian rimawi lama thawh hlawk tak Dolly Parton pawh Jean Hersholt Humanitarian Award dawng tura thlan a ni a; mahse, taksa lam harsatna vangin a hmunah hian a tel thei lo a ni. Cruise leh Parton bakah choreographer leh actor Debbie Allen, leh production designer Wynn Thomas-te hnenah chawimawina hi hlan a ni.