AiduPlay Esports Rising Cup hmawr bawk hnai

AiduPlay E-Sports Rising Cup 2025 khelh mek chu a hmawr bawk a hnai ta. November 21 leh 22 hian Hawla Indoor Stadium, Republic Vengthlangah Grand Final neih a ni dawn a, Final hi LAN Event (hmunkhat a khelh tur) a ni ang.

E-Sports Rising Cup hi a season 3-na niin, Rip Mizo Gaming huaihawt a ni. Kum 2023 khan Esport Rising Cup hmasa ber chu state sorkara sport enkawltu, Mizoram State Sports Council leh Rip Mizo Gaming thawk dunin an buatsaih ṭan a ni. Kumin tourney hi North East huam chhung Esports inelna huaihawt tawh zingah lawmman tamna ber niin, lawmmanah hian Rs nuai 3 sem chhuah a ni dawn.

Tournament hi mobile game-a ṭhalaiten an khelh nasat ber pawl, PUBGM(BGMI) hmanga neih a ni a, final khel turin Mizoram pawn aṭang pawhin team ṭha tak tak final khel tur hian an rawn kal dawn a ni. Group final khelh zanah pawh BGMI khelten an ngaihsan leh, India rama esports huanga fan ngah tak mai, ScoutOp leh Kaashvi Hiranandani te pawh online video kaltlang a inlan a ni.

AiduPlay Esports Rising Cup Final LAN event hi a hmunah man chawia en theih a ni dawn a, kal thei lo tan pawh AiduPlay Apps aṭangin live-in en theih a ni ang.