Knockin' on Heaven's Door

Vanram kawtchhuaha kawngkharpui kik thu Kristian inzirtirnaa thil pawimawh tak a nih rualin, 'Knockin' on Heaven's Door' erawh secular music khawvela hla lar leh nalh a ni. He hla kan sawi ruala mi tam tak rilrua lo lang nghal chu Guns N' Roses a ni a, amaherawhchu anni chauh hi he hla sa an ni lo a, zaithiam lartena an sak nasat ber pawl hla a ni.

'Knockin' on Heaven's Door' sawi ruala sawi lan loh theih loh chu Nobel Prize on Literature dawngtu Bob Dylan hi a ni. He hla phuahtu a ni a, sak a hlawh dan leh a lar dan aṭang ringawt pawh hian music-a Bob Dylan rilzia leh ropuizia a lang awm e.

He hla hi kum 1973-a cowboy film 'Pat Garrett and Billy the Kid' film soundtrack atana Bob Dylan-a'n a phuah a ni. Wild West tuipui tan chuan Billy the Kid hming hi a ropui a, mi tam takin an ngaihsan a ni. Kum 16 mi lek a nih aṭanga puakruk lek a hnehsawhzia chu a hunlai leh a hnu thleng titi a tling a, outlaw hmingthang, dânin man a duh, a zawn a ni. Billy the Kid leh Colin Baker an intawng a, Baker hi sheriff a ni. Billy the Kid a dingchang zawk a, Colin Baker chuan silaimu a tawng a, chuta a thih dawna a thusawi chu 'Knockin' on Heaven's Door' châng khatna thu hi a ni. Kum 1973 khan single-a tihchhuah a ni a, Billboard Hot 100-ah 12 lai a kai pha.

Big screen movie leh TV film soundtrack-ah te a hnu zel thlengin hman a hlawh hle a, chung zingah chuan Lethal Weapon 2 te, Knockin' on Heaven's Door te, Supernatural te, leh film 20 chuangah an hmang.

Zaithiam dangin an sa zui nasa hle a, a hmasa ber chu Sandy Denny a ni a, a hnuah The Alarm, Cold Chisel te pawhin an sa. Heng hnua satu lar leh Eric Clapton kha a ni. Clapton-a sak hi France-a chart-ah 46-na a ni a, Netherlands-ah 31 leh UK-ah 38-na a ni.

Kum 1987 khan Guns N' Roses chuan an live set-ah he hla hi an telh a, kum 1990 khan studio-ah an record a, kum 1991-a Use Your Illusion II-ah khan an dah ta a ni. Kum 1992 khan zaithiam ropui, AIDS vanga thi, Freddie Mercury pualin concert ropui buatsaih a ni a, hetah hian Guns N' Roses hian he hla hi an sa a, sawizui laih khawp a tling hial. He concert hi London-a Wembly Stadium-ah neih a ni a, mi 72,000 zet concert-ah hian an kal. Avril Lavigne, Dolly Parton, Bruce Springsteen, Bon Jovi leh U2 te pawhin he hla hi an sa.