Boomarang Hornbill Festival-ah an che dawn Boomboom-a’n Malmsteen concert a open dawn

December chawlhkar hmasa bera neih tur, Hornbill Festival-ah Boomarang chu guest artist-a sawm an ni a, an che dawn. Hei bakah an guitarist Boomboom-a chu Arunachal Pradesh-a guitarist ropui, Malmsteen-a concert neih turah opener tur atan sawm a ni.

Kumina Nagaland-a Hornbill Festival neih turah hi mipui tam lehzual an tel theihna turin Kohima-ah chauh event a awm dawn lo a, Dimapur, Mokokchung leh Phek-ah te event buatsaih a ni dawn a ni. Dimapur-ah hian Hornbill International Music Festival neih a ni dawn a, hetah hian Boomarang hi guest band an ni a, Friday hian an che ang. Anni bakah hian India rama zaithiam dangte pawh an zai ang.

Boomarang hian tunlai hian Mizoram pawnah sawmtu an hmu hnem hle a, Hornbill aṭang hian an zin chhuak nghal char char dawn. Hornbill-a an chet tukah Guwahati an pan nghal ang a, chumi hnuah Cherrapunjee-a Shine A Light-ah an che lehnghal ang. Shine A Light-ah hian Boomarang bakah India rama band ṭha dangte an che bawk dawn.

December 17, Inrinni khian khawvel puma guitar thiam lar ropui, Yngwie Malmsteen chuan Dambuk, Arunachal Pradesh-ah concert a nei dawn a, hetah hian Boomarang guitarist Boomboom-a chuan opening act a chang a, guitar a zuk zut ṭe dawn. Boomboom-a chuan, ìBand ang chuan kan kal dawn lo a, keimah min rawn sawm a, guitar solo a ni deuh ber ang,î a ti. Line up erawh a awm a ngai dawn tho a, amah pui tur hian keyboardist atan Shillong-a mi, drummer atan Arunachal Pradesh-a mi te a hmang ang a, bassist pawh pawh chawp tur a ni ang.

Boomarang hi India rama band hlawhtling tak a ni a, Universal label hnuaia mi an ni. Changtlung takin awm mah se album thar emaw, music thar emaw chu an la ngaihven vak lo. Nupui nei a, chhungkaw pa an ni deuh fur tawh a, thil tih a harsa sawt viau. Amaherawhchu an intuaithar reng a, album thar emawte chu kan hmu leh ngei turah ngai ang.