Guitarist of the Decade Alter Bridge guitarist Mark Tremonti

Khawvela guitar magazine lar Guitar World chuan kum 10 chhunga guitarist ṭha ber thlanchhuahna neiin, Alter Bridge guitarist Mark Tremonti chu ṭha bera thlan a ni.

Guitar World hian kum 10 chhunga guitarist ṭha ber hi anmahni thlanchhuah a ni mai bik lo a, an magazine chhiartute aṭanga vote la in vote hmu tam hi endikna pakhat atan an hmang a, vote hi 50,000 tling lo deuh a tla tih an tarlang.

Vote tlaah hian an lungawi mai lo a, guitar lama tawnhriat nei ṭha tak tak mi 30 awmna panel dinin heng mite hian vote hmu ṭhate hi an ennawn leh a, Mark Tremonti hi guitarist ṭha berah an thlangchhuak ta a ni.

Top 20 thleng thlangin, Nita Strauss, John Petrucci, Mateus Asato leh John Mayer-te chu top 10-ah hian an lang bawk.

Alter Bridge leh Creed guitarist Mark Tremonti hi Guitar World chuan 'Captain Riff' tiin an sawi hial a, a career-ah hian record maktaduai 50 chuang a hralh tawh a ni.

A signature PRS SE guitar leg MT15 amp hmangin, hard rock lam a khawih nasa ber a, shred pawh a hnehsawh hle. "Technique thar thiam tura hmalak nawmna hi thil hlui thei a ni lo. I thiam hnuah erawh magic trick ang mai a ni," tiin guitar-a thil thar nuam a tih thu a sawi chhuak.

Creed 'One Last Breath' hre lo chu an tam lo hle a, a introduction guitar kal dan pawh a hunlai chuan Mizo guitar preh ṭhinte chuan thiam ngei tura an ngaih zinga mi a nih ṭhin kha. A guitar solo mawi tak tak tam tak zingah 'Bleed it Dry', 'Find the Real' leh 'Blackbird'-a a guitar solo-te chu mi tam tak mawi tih zual an ni.

Nigerian American musi­cian,instrumental progressive metal band Animals as Leaders dintu leh lead guitarist Tosin Abasi chu guitarist ṭha ber dawttua thlan a ni a, blues leh soul lam khawih nasa tak Gary Clark Jr chu pathumna a ni bawk.

Alice Cooper pui ṭhintu, hmeichhia guitarist thiam tak Nita Strauss chu kum 32 mi chauh la ni mah se Guiatrist of the Decade-ah palinaah a lang phak. Ani hian a signature Ibanez guitar nen guitarist khawvel a chiah hneh hle a ni.

Guitarist chuai thei lo John Petrucci chu panganaah a la lang phak bawk. Ani hi chu tunge  a nih sawi tam a ngai loin mi tam tak hriat lar sa em em a ni a, kum 30 chuang zet chu khawvela guitarist ṭha ber pawla mi tam tak ngaih reng a ni a, a la chuai mai dawn lo niin a lang.

Guthrie Govan chu pasarih­naah a lang a, Instagram lama lar tak leh Tori Kelly guitarist Mateus Asato chu pakuana a niin John Mayer chu 10-na a ni bawk. Avenged Sevenfold guitarist Synyster Gates pawh 13-naah a awm a, Joe Satriani chu 17-naah a awm ve bawk a, Steve Vai pawh 20-naah a awm a ni.

Guitarist of the Decade a nih miau avangin tunhnai kum 10-a lar zualte chuan vote an hmu ṭha tih a lang a, guitarist bon tak tak top 20-a lang phak lo an awm nual tih pawh a hriat. Guitar World Guitarist of the Decade hi guitar thiam ber tihna a ni kher lo a, tunlaia guitarist duhtu ngah ber a ni ti ila kan sawisual tam awm lo e.

1.     Mark Tremonti

2.     Tosin Abasi

3.     Gary Clark Jr

4.     Nita Strauss

5.     John Petrucci

6.     Joe Bonamassa

7.     Guthrie Govan

8.     Polyphia

9.     Mateus Asato

10.     John Mayer