Zaninah Hlapui Concert awm dawn

Classical music ngaina tan chuan hmaih phal chi miah loh tur, Hlapui Concert chu zanin hian buatsaih a ni dawn. Hlapui Concert hi The Leprosy Mission Choir-in kum 20 a tlin champha phak lawmna tur a ni a, dar 7:00 aṭangin Vanapa Hall-ah concert hi neih a ni ang.

The Leprosy Mission Choir hi kum 1996-a din kha a ni. Khatihlaia The Leprosy Mission, Mizoram Executive Committee chuan ph‚r puala rawngbawlna tihchak lehzual nan zaipawl neih ṭhain a hria a, kum 1996 March 13 khan The Leprosy Mission Choir hi din a lo ni ta a ni.

Tun term-a The Leprosy Mission Choir te hi rawngbawlin an chhuak nasa tawh hle. Kohhran hrang hrangah rawngbawlin an chhuak a, chubakah chuan TV leh radio-ah rawng an bawl. Internet kaltlangin Ireland lam thleng thlengin rawngbawlna an nei. Kumin chhungin hla vawi 148 zet an zir tawh a, khaw 17 laiah rawngbawla chhuak tawhin, hla 428 lai an sa tawh a ni.

Zanina kum 20 an tlin puala concert an neih turah hian classical music lam an hrut nasa dawn a, a bikin George Friedrick Handel-a hla an sa dawn. Handel-a oratorio lar, The Messiah-a mite an sa nasa dawn. Handel hla ngaina leh classical music ngaina tan chuan en ngei a chakawm khawp ang.