Bible Quiz-ah N. Vanlaiphai an hre ber

Saron Branch KṬP buatsaih Inter Branch KTP Bible Quiz chu Thawhlehni zan khan zawh fel a ni a, N. Vanlaiphai Bangla Veng Branch an thiam ber a, pakhatna an ni ta.

Bible Quiz-ah hian KṬP Branch 107 an tel a, chung branch aṭang chuan N. Vanlaiphai Bangla Veng Branch chuan point 130 hmuin Champion an ni. Champion hian lawmman Rs. 70,000 an dawng a, pahnihna hi Leitan Branch niin point 125 an hmu a, lawmman Rs. 50,000 an dawng a, pakhatna leh pahnihna hian keyboard, trophy leh thuchei an dawng ve ve. Keyboard-te hi Music Home-in an tumsak a ni. Finalist dang branch pahnih Melthum Branch leh Chanmari West Hmarveng Branch ten Consolation Prize Rs. 10,000 leh thuchei an dawng ve ve bawk.

Champion N. Vanlaiphai Bangla Veng Branch aiawha telte chu C. Vanlalpeka, leh Laltlanliana te an ni a; pahnihna Leitan Branch aiawha telte chu R. Lalramliana leh Lalropianga te an ni.