ROBLOX-a chat hmang tur tan facial verification ngai dawn

Khawvel hmun hrang hranga naupangin an khelh nasat, online game platform Roblox chuan kum naupang zawk tana khelh him zawk a nih theihna turin facial verification a hmang tel tawh dawn.

Thawhlehni aṭang khan Roblox kheltute chuan mahni duhthlannain age verification tih theih a ni ṭan tawh. December kar hmasa ber aṭang hian Roblox chuan hmun thlan bik Australia, Netherland, leh New Zealand-ah te age-check hi an kalpui anga, khawvel pumah nakkum January aṭangin hman ṭan a ni dawn thung.

Gaming platform-ah hian naupang kum tling lo leh puitling inkara inbiakpawhna tihtlemna tur (age-based chat) kalpui a ni bawk ang. Facial age check hi online platform zinga hmang hmasa ber an ni ang.

Age-check kalpuina tur hian Roblox kheltute chuan app chhunga camera hawngin screen-ah tihdan tur a rawn lang dawn a, chumi zulzui chuan mahni hmel thlalak a ngai dawn a ni. Check zawh hnuah thlalak leh video-te hi Roblox chuan a delete leh dawn a ni. Heng kum bithliah hrang hrang paltlang lo tan in-game chat-ah an kum milpuite nen chauh a inbiak theih tawh dawn a ni.

Roblox chuan Safety Center a tlangzarh bawk a, nu leh pa leh naupang enkawltute chu kaihhruaina mumal zawk a pe dawn a, Parental Control hmangin naupangte chuan him zawkin online an hmang thei dawn a ni.