Lehkhabu bawm : Dr. Jonathan Lalrinmawia ' Pakla Hisâp'

Dr. Jonathan Lalrinmawia lehkhabu hmasa, 'Pakla Hisâp' chu Inrinni khan Mizo Writers Association President R. Lallianzuala'n a ziaktu chenna in, ITI Vengah a tlangzarh. Lalengmawia Colney, Mizo Grammar Society General Secretary chuan lehkhabu thlirlawkna hun a hmang.

'Pakla Hisâp' -ah hian tunlai thiamna ril ber ber – technology lama khawvel thiamna sang vawrtawp chanchin leh mihring nun lairil, mihring chhungril philosophy mawi takin pho lan a ni. Science lama thiamna sang ber ber pawchhuaktu scientist ropui chungchuangte chanchin leh Mizo pa naran hringnun hlimawm tak chu ngaihnawm taka chuktuah khawm a ni. Artificial intelligence ṭobul leh a ṭangkaizia chungchang kan chhiar rualin Mizo pa ‘pakla hisap’ pawimawh leh nep bik lohzia kan hmu tel bawk.