NTSM-in Rev. Dr. Vanlalnghaka Ralte lehkhabu tlangzarh

New Testament Society of Mizoram (NTSM) chuan Rev Dr. Vanlalnghâka Râlte chawimawinan lehkhabu "Paula Zirtîrna leh Tunlai Khawvêl" an tichhuak. Inrinni liam ta khan Ramhlun North Presbyterian Kohhran Hall-ah Mizoram Synod Executive Secretary, Rev Dr. K. Lallawmzualan a tlangzarh. Hemi rual hian Rev. Dr. Vanlalnghâka Râlte lehkhabu tho "Redemption of the Body Theology of Paul" tih chu Upa Prof. R. Lalthantluanga'n a tlangzarh bawk.

Rev. Dr. Vanlalnghâka Râlte hi Mizoram Presbyterian Kohhran Pastor pension, Thuthlung Thar zirna lama Doctorate nei a ni. Aizawl Theological College-ah Thuthlung Thar Professor leh Principal a ni ṭhin a; kum 2022 khan Mizoram Synod Moderator a ni tawh bawk. Aizawl Theological College-ah Adjunct Professor leh Bible Society of India, Aizawl Auxiliary-ah President a ni mek a ni.

Lehkhabu tlângzarh inkhawm hi Rev. Dr. L.H. Rawsea, Chairman, NTSM-in kaihruaiin, Rev. V.L. Krosschhuanmawia, Secretary, NTSM-in lehkhabu buatsaih dan report a pe. Rev. Lalrinthara, Patron, NTSM leh Rev. Dr. P.R. Hmuaka, Vice Chairman, NTSM ten lehkhabu thlirlawkna an nei.

NTSM hi December 7, 2024 khan Mizote zinga Thuthlung Thar leh a kaihhnawih thilte zirna tihmasawn tura din a ni. Rev Dr. Zaihmingthanga chawimawinan Thuthlung Thar Theology tih chu chhuah a lo ni tawh bawk. "Paula Zirtîrna leh Tunlai Khawvêl" tih hi Synod Bookroom hrang hrangah lei theih a ni.