Mizo Film Award Hruaitei & Omomi-ten host dawn

Mizo Film Award 2025 chu tunkar Zirtawpni zan hian Dawrpui Multipurpose Centre-ah sem a ni dawn a, kum hmasa lama hnehsawh taka lo host tawh, Hruaitei chuan kuminah a host leh dawn a, Omomi hmel kan hmu dawn bawk.

Omomi hi Comedian Search leh platform dangah pawh kan lo hmu tawh ṭhin a, Mizo Film Award-a a che vel hmuh a chakawm tawh hle. Hruaitei pawh LPS Most Wanted leh Mizo Got Talent lamah kan lo hmu tawh ṭhin a, Mizo Film Industry hrechiangtu zinga mi a nih avangin a ngaihtuahawm lo hle.

Mizo Film Award hi kum 2021 aṭanga sem ṭan niin, kumin hi a vawi 4-na tur a ni. Mizo Film Industry huangah chuan Award hlun leh ngaihhlut hlawh ber a ni chho mek a, nominee pawh an ṭha hlawm hle. November 2024 leh October 2025 inkara Mizo film chhuak thar hrang hrang 50 aṭangin category 13-ah Award hi sem a ni ang. Zai leh lam hmuhnawm tak a awm dawn a, Mizo Got Talent aṭanga Zoram mipuiin kan hmelhriat Magic Show thiam 2MG an che dawn bawk. Programme hi Aidu Play App-ah live-a pekchhuah a ni ang.