Box Office Wonder Woman 1984 a la chungnung ber zel
Box Office-ah Wonder Woman 1984 bawkin ro a la rel chhunzawm zel a, kar tawp liam taah khan North America Box Office-ah a sum lakluh khum thei an la awm lo. The Croods: A New Age chu pahnihna ni lehin News of the World chu pathumna a ni bawk.
Kar thumnaah pawh WW 1984 bawk
A zawnin kar thum chhung Gal Gadot channa Wonder Woman 1984 hian North America Box Office-ah ro a rel ta a, kar tawp liam taah pawh khan $maktaduai thum a lalut leh a ni.
Wonder Woman film pahnihna hi hrileng kara film tlangzarh zinga sum lalut tam ber pawl ni tawh mah se a budget khum tur erawh chuan an la beih ve fe a ngai dawn a ni. North America Box office aṭang hian $mtd 32 a lalut tawh a, ram dang aṭanga a sum lakluh $mtd 99.5 nen chuan $mtd 132 lai chu sum a lalut tawh. Mahse film siamna atan hian $mtd 200 vel lai chu an seng nia tarlan niin hemi khum tur erawh hi chuan hun a la duh deuh dawn niin a lang.
Gal Gadot DC hero hian sum tam tak an la hloh zawk niin a lang a, hetichung hian Warner Bros. lam chuan WW part 3 atan Gadot leh director Patty Jenkins-teah rinna la nghat zelin an be fel tawh thung. Hri leng karah tlangzarh chu ni lo se a sum lakluh hi hemi let aia tam fe hi a ni ang tih erawh a rin thiam theih.
Danglam tam lo Box Office
Kar hmasaa pahnihna The Croods: A New Age bawk pahnihna a ni leh a, News of the World pawh pathumna bawk a ni leh.
Lilla Jovoich channa Monster Hunter chu palina a ni leh a, pangana pawh kar hmasa lama pangana Fatale bawk a ni leh. Tunkar Box Office chart-a a top 8 hi chuan an dinhmun ngai vek an luah leh a, Come Play chu kar hmasa lamah 10-na ni mah se pakuanaah a rawn chho ve thung a, Alien (2020 Re-release) chu 10-na a ni thung.
Box Office top 10
1 Wonder Woman 1984 $3,000,000
2 The Croods: A New Age $1,810,755
3 News of the World $1,236,185
4 Monster Hunter $1,106,032
5 Fatale $656,606
6 Promising Young Woman $566,285
7 Pinocchio $221,022
8 The War with Grandpa $145,822
9 Come Play $95,430
10 Alien (2020 Re-release) $60,000