Tun kara hla lar ber Olivia Rodrigo 'Drivers License'

Olivia Rodrigo single 'Drivers License' chu a tlangzarh aṭangin ni li chiah a la liam a, streaming chart hrang hrangah topper a ni nghal!

Olivia Rodrigo hi tunge a nih i la hre lo a ni mai thei, kum 17 mi lek a la ni a, hla pawh a la tichhuak tam lo. Kum 2019 khan 'All I Want' a tichhuak a, hei hi a channa 'High School Musical: The Musical: The Series' album-a mi niin  'Drivers License' hi ama puala single a neih hmasak ber a la ni. Hmalam hun a nei eng hle.

Rimawi khawvelah a la mikhual angreng ti ila kan sawi sual tam awm lo e.  Disney Channel series Bizaardvark-a  Paige Olvera lem a chan vangin lemchan khawvelah erawh hmelhriat tu an awm nual tawh ngei ang. Zirtawpni liam ta mai khan 'Drivers License' hi a tichhuak a, streaming platform hrang hrangah ngaithlatu an tam nghal. 

Spotify US chart, Apple Music overall track chart leh Amazon overall top songs chart-ahte ni thum chhung lekin No.1 a ni hman. iTunes chart-ah pawh No.1 a ni a, YouTube-a music video a dah chhuah pawhin thlirtu maktaduai 13 chuang a nei tawh.