Neuhof School-in Major Production chhawp chhuak leh dawn

Neuhof English Medium School chuan a vawi 4-na atan November ni 27 leh 28 zanah Vanapa Hall-ah show pui tak, Major Production a chhawp chhuak leh dawn.

Neuhof School Major Production hi naupangin rimawi intumchawpa zai leh lama lemchan hmuhnawm tak an entir ṭhinna a ni a, mit leh beng a tlai ṭhin hle. Kum 2013-ah “The Lion King”, kum 2016-ah ‘Mamma Mia’ leh kum 2019-ah ‘The Greatest Showman’ hmang tein show hlawhtling an lo buatsaih tawh a ni.

Kuminah hian Bible-a Josefa thawnthu zulzuia 'Joseph and the Amazing Technicolor Dreamcoat' play, Andrew Lloyd Webber leh Tim Rice ten an lo buatsaih behchhanin zirlaite’n an chang chhuak leh dawn. Hla 22 hmangin Genesis bu chhunga thawnthu ngaihnawm tak mai an puang chhuak dawn a, a hmuhnawm leh hle ang.

Neuhof English Medium School hi kum 41 ni tawhin, Mizoram chhunga hetiang Theatrical Production lian tham nei thei awmchhun school an ni.