HYBE Labels-in Hong Kong-a kangmei tuarte tan sum thawh

South Korean entertainment company, HYBE Labels chuan nimin November 28 khan HYBE Music Group APAC aiawh label parukten November 26-a Hong Kong kangmei nasa tak chhuak vanga nunna chantate an tawrhpui thu tarlangin, harsatna tawkte ṭanpuina turin HKD 2,660,000 (USD 340,000) an pe.

HYBE chuan kangmeiin chhiatna a thlenna hmunte chu a rang thei ang bera siamṭhat an beisei thu an tarlang. An sum pek HKD 2,660,000 chu Hope Bridge Korea Disaster Relief Association-ah an hlan a, fund hi kangmei tuar chhungkuate ṭanpuina atan hman a ni ang. Tai Po District, Hong Kong-a November 26-a kangmei chhuakah hian mi 128 an thi tawh tih report a ni. Kangmei chhuahna hnaih takah hian K-pop music award lian, MAMA Awards 2025 chu November 28 leh 29-a neih tura ruahman a ni a; chhiatna thleng vang hian programme pawh siam danglam niin, ceremony chu ruahman lawk anga kalpui ni dawn mah se red carpet event cancel a ni. He hun hmang tur hian K-pop idol tam takin Hong Kong hi an pan a ni.