IFFI 2025 khârnaah Mizo an inlan

International Film Festival of India (IFFI) vawi 56-na chu Panjim, Goa-ah Zitawpni liam ta November 28 khan khâr niin, a khârna inkhawmah hian Mizo hnam lam cheraw pawh entir a ni. 56th IFFI hi November 20 khan hman ṭan niin, hawnna inkhawmah hian kum danga la tih ngai loh cultural parade neih a ni bawk.

Khârnaah hian Northeast Cultural Showcase buatsaih niin, hmarchhak state hrang hranga mite'n an hnam lamte an entir. Mizo hnam lam zinga lâr ber Cheraw pawh entir a ni a, Cheraw entirtute hi Guwahati-a Mizo nula leh tlangvalte an ni. Heng bakah hian Mizoram, Assam, Arunachal Pradesh, Tripura, Sikkim, Manipur, Nagaland, Meghalaya, Rajasthan leh Karnataka aiawhte'n a huhoin lam mawi tak an entir bawk a ni.

IFFI 2025 ṭan aṭanga a tawp ni thlengin ni tin film eng emaw zat, Indian film-te leh international film-te theatre hrang hrangah chhuah ṭhin a ni a, mipuiin an hlut hle. November 28 zana a khârna inkhawmah hian sorkar lama mi pawimawh tak tak leh film & cinema lama mi langsar tak tak an tel.