34th Lelte Award sem a ni leh dawn ta

Mizo award hlun ber, Lelte Award chu a vawi 34-na turin zanin hian Dawrpui Multipurpose Centre-ah sem a ni leh dawn ta. Mizo zaimi leh rimawi huanga thawm nei lian tak tak bakah, Mizo tihmingṭhatute hnenah Special Award leh Lifetime Achivement-te hlan a ni ang. Award semna hi Mafeli Hlondo in a kaihruai dawn a ni.

Award chi hrang 38 sem chhuah tur zingah 'Special Award' chu India sipai huaisen Lawmzuala, 'Thih leh Dam' tih hla aṭanga Zoram deng chhuaktu Kawrthah naupang Lalrinnunga leh rawngbawltu ropui Rev. Thawng Za Thangte hnenah hlan a ni dawn. Kumin hian Lifetime Achivement dawng turin Ruata Zote, zaithiam leh hla phuah thiam thlan a ni bawk.

Lelte Award hi rimawi huangah Gospel leh Lengzemah ṭhen a ni dawn a, category paruk ve ve a awm dawn a ni. Hei bakah hian Open category siam niin category pali a awm ve thung. Zaithiam chhuak thar hit pahnih Lalsangliana leh J.Lalrosangate chu Singer of the year (Male) Lengzem category-ah leh Open category 'New Artist of the Year'-ah an lang dun. Chibil Award siam a ni bawka, Zofa hnam hrang hrang aṭanga zaithiam ṭha tak takte hnenah hlan a ni dawn bawk.

Zanin hian tunlai zaithiam lar leh ṭha tak takte an in lan dawn a, mit leh beng a tlai hle a rinawm. Minister B. Lalchhanzova leh Prof. Lalnithanga te bakah ICFAI Mizoram Vice Chancellor Prof. Ginlian Lal Buhrilte'n hun an hmanpui dawn a ni.