Zaninah Rimawi Award sem a ni dawn

Mizorama rimawi huanga thawm nei liante chawimawina, 'Rimawi Award' chu zanin hian Mizo Zaimi Inzawmkhawm General Headquarter buatsaihin sem a ni leh dawn ta. Award semna hi zan hnih chhung neih tur a ni dawn a, zanin hian Gospel huangah semin naktuk zanah Lengzem huangah sem a ni ang. Award ceremony hi LPS Arena, Falkland-ah hman a ni dawn a ni.

Rimawi Award hi category 20 aṭangin sem a ni dawn a, Special Award leh Lifetime Achivement Award hlan a ni dawn bawk. Special Award hi Esther Hnamte hnenah hlanin, Lifetime Achievement Award hi hranghlui leh tunlai ṭhangtharte thlenga lawm hlawh, H. Vanlalhlana hnenah hlan a ni ang.

Gospel huangah Jonathan Lianhna chu nomination hmu tam ber niin, award ngaihven hlawh Best Male Artist-ah a lan bakah, 'Song of the Year' leh 'Song writer of the year'-ahte a lang. Zoramchhani, Israela Pachuau, Zorema Khaingte, leh Peter Lalnunpuiate'n nomination pahnih ṭheuh an hmu bawk.

Lengzem lamah Lesky Hype-in nomination hmu hnem berin pathumah a hmu a, Lalsangliana leh J. Lalrosanga ten dawtin pahnih ve ve an hmu. 'Best Male Artist' leh 'Song of the year' ah nomination hi an hmu ve ve a ni.

Best New Artist(Male)-ah Mizo Idol Immanuel Lalremruata bakah Zomuansanga-te an lang a, Best New Artist(Female)-ah Vanlalneihpuii leh Sylvia Malsawmpuiite an lang dun bawk. Rimawi Award ceremony hi LPS leh MZI Official YouTube channel-ahte live-a pek chhuah a ni dawn.