Netflix kalphung thlak danglam dawn lo

Khawvel entertain-ment service lian ber zinga mi, Netflix-in Warner Bros. leh HBO Max a lei dawn tih a puan hnuah customer-te hnenah thuchhuah siamin, service leh subcription hman sa thlak danglam a ni dawn lo tih an sawi.

Streaming company chuan, Zirtawpni khan Netflix subscriber maktaduai chuang hnenah Netflix-in Warner Bros. a lei thu hi email-in a thawn chhuak a ni. Netflix hian Warner Bros. a film leh television studios, HBO Max leh HBO pawh telin a lei dawn tih a lo puang tawh a ni. Warner Bros. franchise hmuhnawm tak tak; Harry Potter, Friends, The Big Bang Theory, Casablanca, Game of Thrones leh DC Universe bakah, Stranger Things, Wednesday, Squid Game, Bridgerton leh KPop Demon Hunters-te a en theih dawn a ni.

Hemi chungchangah hian Netflix chuan, streaming service-te chu a hranpaa kalpui a ni dawn tih an sawi a, thlak danglam a awm dawn lo, an ti. Netflix leh Warner Bros. Discovery chuan thla 12-18 chhungin transaction tihfel hman an beisei thu an sawi. Inremna an siamah, Netflix chuan Warner Bros. film leh TV studios, HBO Max and HBO bakah Warner Bros. Games business pawh a lei tel dawn. Inremna an siam equity value chu USD tld 72 a ni, enterprise value chu USD tld 82.7 a ni.