Dinsangi’n Krismas hla a tichhuak dawn

‘Its A Beautiful Day', Mizo version aṭanga Zoram mipui tam zawk hriat lar Laldinsangi(Mami) chuan zai bakah, hla phuah pawh a thiam tih Zoram mipuite min hmuh tir nawn leh dawn; Krismas hla thar ama phuah ngei "Isua lawmin" tih chu zanin dar 8 hian a YouTube channel Laldinsangi Mami ah en theihin a tichhuak dawn. Mizote’n Krismas lam hawi hla ṭha tak kan neih belh leh dawn a ni.

Mami hian a hla phuah ngei a a tihchhuak vawihnihna tur niin, tunhnaiah khan Ṭhazual chart-ah pawh a lan pui 'Ka Ring Che' tihchu a lo tichhuak tawh bawk.

‘Isua Lawmin’ tih hi SM Digital Records, Champhaia record ani a, 'Its A Beautiful Day' hla aṭanga alo thawhpui tawh Ben Opa chu music producer a ni leh a ni. Ben Opa hi a hla zawng zawngah sulhnu a la nei vek a; tun tumah pawh thawkdun lehin beng a fah leh viau ang.

Hla thar a tihchhuah tur chuangchangah hian Dinsangi chuan, ‘Krismas hi midang nena kan inrem nan te, kan phurrit te pawh Pathian kuta dah a, kan tana Lal piang hlut zia hre chunga hlim leh lawm taka kan hman theih nan Pathianin he hla hi a ngaithlatu zawng zawng tan malsawm se’ a duh thu a sawi.

Dinsangi hian a hlaah hian Remna palai Isua piancham chu hlim taka hmang turin min sawm a, fam ngai lusun leh phurrit phurte pawh Isua ke bulah innghat turin a sawm a ni.