'Girish and The Chronicles' in Aizawl Rock dawn

Hunpui kan hman hma in rock music hmangin Zawl khawpui ṭhap a ni leh dawn; India rama rock band lar Girish and The Chronicles (GATC) chuan December 22 Thawhṭanni zan hian AR Ground, Lammual-ah rock concert ropui tak an rawn nei dawn. Sikkim aṭanga bul rawn ṭan niin, Bengaluru ah an inbengbel mek a ni, GATC hi kum 1980's hunlaia lar Hard Rock leh Heavy Metal la chhawm nung zui tlat an ni a, Guns N' Roses ang tlukzeta ngaihsan hlawh an ni ṭhin.

Band-ah hian member pali Girish Pradhan (Vocalist/Guitar), Suraz Sun (Lead Guitar), Yogesh Pradhan (Bass), leh Nagen Mongrati (Drums) te an awm a, an thawhhona ṭhat avanga hriat hlawh tak an ni. America's Got Talent (AGT) ah Indian rock band tel hmasa ber niin, international rock band lian tak takte nen pawh stage an lo inṭawm tawh ṭhin bawk. "Hail to the Heroes", an album thar tihchhuahte chuan khawvel pumah an hming a chawi san phah hle.

Lammual-a concert hian rock music phochhuahna hun ṭha tak Aizawl mipuite tan a chhawp chhuak ngei beisei a ni. GATC bakah kan Mizo artist ṭha Laldinsanga Ralte, Emmanuel, Mt.Carmel special item, Purple knob, Priskil, Jaui, Zorinzuali Khiangte te performance hmuh tur a awm dawn bawk. He zan ropui taka tel thei turin ticket man hi Rs 500 leh Rs 1000 in markevents.org ah lei theihin a awm dawn bawk a ni.