Red Kettle : Salvation Army-te'n Ketli sen an dawh leh dawn

Salvation Army-te chuan nimin tlai dar 3-ah khan Red Kettle kick off neiin, tourism minister Robert Romawia Royte chuan a kick off.

Red Kettle service hi khawvel puma Salvation Army-te chuan Krismas dawnah mi chanhaite puala vehbur khawnna atan an hmang ṭhin a, Krismas hma kar thleng chu hmun hrang hrangah Ketli sen khaiin, Corps hrang hrang Band-ten rimawi play pahin vehbur an khawn leh tawh dawn a ni.

Nimina kick off programme hi Lt.Col.Zothanmawia, SPA chuan kaihruaiin, Territorial Staff Band-ten rimawi an play a, Territorial Staff Songsters, Central South Division Songsters leh Central North Division Songsters-te an zai bawk.

Hlimhlimi leh Duhsaki-te zai bawkin, Ebenezer YP Corps-ten timbrel display an neih bakah Vaivakawn YP Corps-ten lam hmuhnawm tak an entir bawk a ni.

Commr Nu-i, TPWM chuan ṭawngṭaina hun neiin Lt. Col Simon S.P, CS chuan malsawm ṭawngṭainain programme hi a khar a ni. Salvation Army-te hian nikum khan Red Kettle service aṭang hian cheng nuai 36 hmuchhuakin, chhungkaw 36 hnenah Rs 5000 man hu ṭheuh ṭanpuina an pe a, damdawi-in parukah Rs 20,000 ṭheuh pein, Grace Home, Durtlangah Rs 20,000 an pe bawk a, ṭawngṭai Bethel Camping Centre, Chawnpuiah Rs 50,000 an pe bawk.

"Red Kettle Service aṭanga kan sum hmuhchhuah mi harsate ṭanpuina atana Salvation Army-te'n kan sem hi, Salvation Army pek ni loin mipuite thinlunga Pathianin thilphalna a pek, Mizoram mipui­te'n kan pekkhawm 

aṭanga semchhuah a ni. Salvation Army chu a hmanrua chauh kan ni a, chuvang chuan in phal ang tawk Ketli senah hian lo thlak ve turin kan sawm a ni," tiin Capt. Charles Chalrimawia, TSB leh TSS Executive Officer chuan Vanglaini a hrilh.