2026-ah PUBG Mobile Global open 2 awm dawn

Khawvel huapa mobile games huanga thawm nei lian, PUBG Mobile chuan 2026 Esports roadmap tichhuakin nakkum 2026 season chhungin Global Open pahnih a awm dawn tih a tichiang. Global open pahnih awm turte hi PUBG Mobile World Cup leh PUBG Mobile Global Championship-te a ni dawn tih pawh an puang chiang nghal.

PUBG Mobile 2026 season hi season hnihah ṭhen a ni dawn a, PUBG Mobile Global Open (PMGO) tourney chu national leh regional qualifier siam a ni dawn. KRAFTON chuan PUBG Mobile National Championship event chu hmun hrang hrang pariatah vawi 30 chuang huaihawt tum a nih thu an tarlang bawk.

2026 season major event hmasa zawk PUBG Mobile Global Open Season 1 chu Southeast Asia-ah neih a ni dawn a, team telte chuan prize pool USD 500,000 an in chuh thei dawn bawk a ni.