Hnam inhmuhsitna lantira puh Miss Finland title hlihsak

Miss Universe pageant 2025-a Finland aiawhtu, Miss Finland Sarah Dzafce chu Miss Finland Organization chuan a social media post-ah Asia mite hmuhsitna hawi zawnga thlalak a post avangin national title chelh lai an hlih sak tih an puang.

Sarah hian thla hmasa khan social media-a thlalak a post-ah a mit chu pawt zimin, 'eating with Chinese' tiin a caption a dah bawk. Sawiselna a tawk zui nasa hle a, Asia mite bakah an ram mite ngei pawhin an sawisel. An ram prime minister pawhin Sarah thiltih hi sawiselin, ngaihtuahna nei lo leh mawl thlak lutuk tiin a sawi a ni. Sarah hian a hnuah ngaihdam dilna siam leh mah se, Finnish ṭawnga a ziah avangin Chinese bakah Asia mi dangte pawhin an hrethiam dawn lo a, a ti tak tak lo nia sawisel zui a ni bawk. A hnua a insawifiahnaah a mit chu a thil ei lai a luh vang leh, a caption pawh a hriatpui loha a ṭhianten an lo ziah niin a sawi a, mahse, a thusawi hian awih a hlawh lem lo.