LBS Suzuki Youth Icon & Super Dance Crew 2019 Youth Icon 2019 Zothanpuii Super Dance Crew 2019 Ferocity

LBS Suzuki Youth Icon & Super Dance Crew 2019 chu hun eng emaw chen kalpui a nih hnuah Inrinni zan khan a hmawr bawkna neiin, intihsiakna neihna hmun Dawrpui Multipurpose Centre-ah result puan a ni ta. Chanmari West nula Zothanpuii chu Youth Icon 2019-ah thlan niin, Ferocity-te chu Super Dance Crew 2019-ah thlan an ni bawk.

Inrinni zanah hian intihsiakna neih a ni tawh lo a, chutihrual erawh chuan show hmuhnawm tak tak a awm thung. Show ṭan hmain Red Carpet-ah hun hman a ni a, host Baryl Vanneihsangi a zei bawk a, result puan zan boruak a ti 'hot' thiam hle. Red Carpet hi kawng hrang hranga mi bikten zawhin, heng zingah hian Sports minister Robert Romawia Royte-te nupa, hranghlui zaithiam Vanhlupuii, Buta (Vulmawi band), H Rotluanga (zephyr), Rody H Vanlalhriatpuii leh T Ramthanmawii (Miss Mizoram), boxer NT Biakkima leh everester  David Zohmangaiha-te pawh an tel.

Red Carpet zawhte hian Mizo-te hmasawnna tur hrang hrang an sawi ṭheuh a, ṭhenkhatin Youth Icon thar tur fuihnate nei nghal bawkin hemi hnu hian show ṭan nghal a ni a; zaithiam leh lamthiamte'n an thiam an show a, thlirtute mit leh beng a tlai hle.

LPS-in Youth Icon a buatsaih tawha Icon dinhmun lo chelh tawhte chu 'Grand Finale' zanah hian an inlan a, Grand Finale-a kalkhawmte zaiin an awi a ni. Zoramchhani, Malsawm­tluangi (Msi), H. Lalrempuia leh K. Lalthlamuan­puii-te'n an zaithiam zia an pholang nawn leh a, programme an tihlu hle.

Youth Icon result puan hma hian Top 3 chinte hi an inlan leh a, Icon Top 3-te hian an duhzawng hla pakhat ṭheuh an sa a, an zai lai hian lamthiamte'n thiam takin an lo lam rem bawk.

Zothanpuii'n thiam tak maiin 'Min chawisang a' tih hla, You Raised Me Up, Mizo ṭawnga lehlin chu sain, a zai lai hian Ferocity-te chu thiam takin an lo lam a, an hmuhnawm hle a ni. Malsawmdawngliana'n stage rawn luahlum zuiin 'Chingal leh Saum' tih hla hmangin kalkhawmte leh TV lama lo thlirtute a rawn buktir suau suau a ni ber. R. Lalsangzuali'n sap hla rawn sa thungin Heart hla 'Alone' a rawn sa a, a sa thiam hle. Ani hi Flava-te'n lamin an lo ṭawiawm ve bawk.

Mit leh beng a tlai viau hnuah a tawpah thlirtute nghahhlelh ber result puan a ni a, Youth Icon result puan hmasak niin, Top 3-a mipa awmchhun Malsawmdawngliana, Chamring chu pathumna a ni a, R Lalsang­zuali, Ramhlun South chu pahnihna niin Zosangzuali, Chanmari West nula chu Youth Icon 2019 atan thlan a ni ta a ni.

Super Dance Crew-ah hian  Ferocity-te chu pakhatna niin, Hashtag1-te pahnihna an ni a, Flava-te chu pathumna an ni thung.

Pakhatna    Zothanpuii

    Chanmari West

Pahnihna    R.Lalsangzuali (Abawihi)

    Ramhlun South

Pathumna    Malsawmdawngliana

    Chamring

Super Dance Crew Top 3:

Pakhatna    Ferocity

Pahnihna    Hashtag1

Pathumna    Flava