RFL Miss Mizoram District 2020 puang
Mizoram Journalist Association leh Zonet Cable TV ṭangkawp buatsaih RFL Miss Mizoram 2020 inelna neih tur atan district ṭhenkhat chuan an aiawh tur an puang ta. Zirtawpni khan Hnahthial, Kolasbi leh Mamit ten result hi puangin, Inrinni khan Serchhip, Lawngtlai leh Lunglei ten an puang ve leh bawk.
Title sponsor
RFL Miss Mizoram 2020 thlanna hi Mizoram Journalist’s Association (MJA) leh Zonet cable TV tangkawp buatsaih a ni a. Lawmman tur hrang hrang tihfel a ni tawh a, Title sponsor tur pawh an nei fel tawh.
Miss Mizoram 2020 hi RFL Plastic chuan an sponsor dawn a, a hmingah RFL Miss Mizoram tih a ni ang. Miss Mizoram atana thlan hian pawisa fai Rs.1,70,000 a dawng dawn a, Yamaha Fascino 125 Fi Scooter a dawng tel dawn bawk. Modeling Agency Partner, Kay Savino Yhome Scouting, Delhi chuan professional modelling contract pakhat a pe dawn a, a dang ṭha an duhzawng an hmuh belh chuan an lak belh bawk ang. Hei bakah hian Bangalore Fashion Week ah Finalists te zinga mi hian Bangalore designer Mami Khawlhring kaltlangin Bangalore Fashion Week ah ‘walk’ tur thlan a/an ni ang.
Sub-Title Winners ten Rs. 20,000 theuh an dawng ang a, Finalist te hnenah Rs. 10,000 ṭheuh hlan an ni dawn bawk. Top 3 te hi Genesis Gym Membership pek an ni dawn bawk a ni.