UK-ah Eminem a ropui

Eminem ropuina belhchhahin a awm zel a, UK-ah chuan album leh single chart-ah No.1 a ni ve ve.

Eminem hian January 17 khan puang­zar lawk loin a album a tlangzarh thut a, a fan-te a barakhaih hle. Puanzar lawk chiah hi album hlawhtlinna a ni lo tih rawn nemnghet nawn lehin a album hi hralh a kal leh nghal hle a, UK-ah chuan a zawna album 10 No.1 nihpui thei awmchhun a ni ta.

A album thar 'Music to be Murdered by' hi a hlawhtlinpui chho zel dawn niin a lang a, UK-ah chuan record a siam der tawh a, Billboard chart-ah pawh record a siam leh ngei dawn niin a lang. A album-a a hla ṭhenkhat hlathu chu  an sawisel nasa hle a, hei hi Eminem hian chhangletin a hlate chu mi thil duhtui lutukte tana siam a ni lo tih sawiin, chhia leh ṭha hriatna barakhaih thei khawp tura a duan a ni zawk tih a lo sawi tawh bawk.

Nikum December thlaa thi ta Juice WRLD nena an hla 'Godzilla' chu UK singles chart-ah No.1 a ni bawk. Hetihlai hian 'Godzilla' hi a sang fal lo hle thung a, amah hnaih bertu nen chart sale  93 chiahin an inthlau a ni.