Pamela Anderson-i'n PM Modi lehkha a thawn

Nungcha humhaltu pawl 'People for the Ethical Treatment of Animals (PETA)' honorary director Pamela Anderson chuan India prime minister Narendra Modi hnenah lehkha thawnin, sorkar official thiltihna hmuna sa (meat) aia thlai hnah lam ei leh ina siam ṭhin turin a chah.

Baywatch icon star Pamela hian PM Modi hnena he thu a thawn chhan hi environment chhe zel tur venna tura a tih a nih thu a sawi. "Sa kan ei tam chuan boruaka greenhouse gas emissions a pun phah thei a ni," a ti. A lehkhathawnah hian Pamela chuan, "Indian history kan en chuan India hi agriculture lamah a theuneu lo hle a, chuvang chuan kan ramsate rem lohna turin thlai hnah ei leh in uar turin India hian theihna a nei a ni," tiin a ziak. 

Tunhnai lawka Delhi boruak bawlhhlawh chungchang pawh sawi langin, in nei lote leh ramsa, hmaikawr vuah ve thei lote dinhmun a hriatthiampui thu a ziak lang bawk. 

Kumtina India rama tuilian awm ṭhin chu Pamela chuan a vei thu tarlang telin, kum 2050-ah chuan he tuilian thleng ṭhin hian India mi maktaduai 36 a nghawng dawn a ni, a ti. World Bank roport pawh ziak langin, nakkumah chuan India khawpui 21-te chuan groundwater lamah harsatna an tawh dawn thu leh, kum 2030-ah India mipui 40%-in tui intur an tlakchham dawn thu a ziak lang a ni.

Thla hmasa khan Canada prime minister Justin Trudeau hnenah pawh Pamela hian, ramsate an mang mai loh nan an ramin thlai hnah ei an uar zual theihna tura hma la turin ngenna lehkha a thawn tawh bawk.