Hontrade International Ṭhazual Lengzem-ah Ticos Dara 'Lunghlu' a hlu ber
Hontrade International Ṭhazual Lengzem-ah Mizo Idol star Ticos Dara 'Lunghlu' chu pakhatna a ni a, Sangkimi Khiangte 'Tuar thiam a har ngei' chu pahnihna niin Feli Fanai 'Lengdang tang a bel' chu pathumna a ni thung.
Ticos Dara 'Lunghlu' a hlu ber
Mizo Idol 2018 aṭanga Zoram mipuite'n an hriat ṭan tleirawlte star rawn Ticos Dara hla 'Lunghlu' hi Ṭhazual lengzem chart-ah hian a mikhual lo hle. Chart-ah hian a lang satliah a ni lo a, Top 5-a a inhlankaina a rei tawh a, Top 2 dinhmun ṭum eng emaw zat a luah hnuah dinhmun sang berah a rawn ding ta a ni.
September thla laihawla a video a tihchhuah aṭang khan Ṭhazual chart luahlumtu a ni nghal. He hla hi Matlana Chhakchhuak phuah niin, Ticos-a music video palina a ni a, 80's hunlai niawm taka music video an siam hian a tihmuhnawm zual.Ṭhazual Award 2019-a 'Best New Artist Lengzem' award dawng thei a ni a, Ṭhazual chart-a a che ṭha pawh hi a mak lo hle.
Sangkimi Khiangte 'Tuar thiam a har ngei'
Sangkimi Khiangte hla 'Tuar thiam a har ngei' tih chu pahnihnaah a rawn inhlangkai ve leh ta bawk a, a music video-a zei taka Lily Darnei inlanna hla hi YouTube lamah pawh thlirtu nuai 2.6 chuang an awm tawh a ni.
Feli Fanai, Van Hlei Sung leh DJ Lalvenhimi
Chart hmasaa pakhatna Feli Fanai 'Lengdang ṭang a bel' chu pathumnaah a awm ve thung. Tunlai zaithiama huhang ngah ber zinga mi Feli Fanai hnuai chiahah hian MDM artist thar Van Hlei Sung a la awm cheu. Van Hlei Sung hla 'I ṭang ka belh lai khan ka hlim zawk si' tih hi tunlai Mizo hla lar ber zinga mi a ni a, a lyric video a tihchhuah hmasak phei chu mi maktaduai chuangin an thlir tawh a, a music video pangngai pawhin thlirtu nuai 2 chuang a nei leh der tawh.
Top 5 khartu DJ Lalvenhimi pawh hi tu nge a nih sawi nawn a ngai lo. A hla thar 'Ka dawn lungruk' hmangin pangana dinhmun a luah ve thung a ni.