Lusun chhungte hnemtu tur Music Video thar

R. Lalhmingmawia (Mapuia) leh Zozoa-te chuan music video thar  'Thlafam ngaia tlai nilen chu' nimin khan YouTube-ah en leh ngaihthlak theih turin an dahchhuak.

'Thlafam ngaia tlai nilen chu' tih hla hi Mapuia leh a ṭhianpa, Zozoa te’n Hollow Guitar nena an sak, phone Camera hmanga an lak, Social Media-a darh ta chiam kha a ni a, mi tam tak rilru a hneh hle a nih kha. Kha video khan Zamzo Real Estate (ZRE) lam rilru pawh a hneh a ni ngei ang, ZRE lam hian bepawp nghalin recording leh music video pangngai tak siam turin an ngen a, an ngenna chu tihhlawhlin niin music video chu an siam ta a ni.

Mapuia hi Lungmawi khua niin, Kum 2013-a MZI-in an buatsaih HPC Singing Competition-ah khan pakhatna a ni a, music video pahnih a siam tawh nghe nghe. Music leh Recording chu Melody Recording Studio, Lunglei kutchhuak a ni a, Video hi Peter Video Production, Lunglei kutchhuak a ni bawk.   

“Hunpui a lo thlen hian chhungkaw tin deuhthawin kan hmangaih kal ta te kan ngai a, kan khua a har ṭhin. Chuvangin hunpui lo thleng turah hian chutianga hmangaih kal ta te khawhar hnem tur hla tihchhuah ngei hi a ṭul a ni,” tiin Mapuia leh ZRE-te hian Krismas dawna khawhar hla an tihchhuah chhan an sawi.