Indonesia-in 'Grok' block ve leh

Khawvel ram hrang hrang te'n Elon Musk enkawl X platform AI chatbot 'Grok' an sawisel hnuah, Indonesia official-te chuan Inrinni liam ta khan xAI Grok chu an block lailawk rih thu an puang ve leh. Tun dinhmunah Indonesia hmalakna hi Grok laka chet lakna lian tham ber a ni rih bawk.

Indonesia communications and digital minister Meutya Hafid chuan thuchhuah a siamah," Sorkar chuan Grok kaltlanga thlalak dukdak lo leh taksa lang tam thei zawnga thlalak siam danglam chu human rights zah lohnaah a ngai a, mi dang dikna leh mipui himna digital space a tichhia a ni" a ti. Ministry chuan X official-te chu heng harsatna thlengte hi ngaihtuah tura an hriattir nghal thu a tarlang.

xAI Grok hmanga thlalak siam danglam ṭhinte vang hian ram hrang hrang - India, France, Malaysia, leh European Commission te'n sawiselin siamṭha tura hma la turin an lo hriattir tawh a ni. Sawiselna hrang hrang awm vang hian X chuan Grok aṭanga thlalak siam danglam chu paying subcriber-te tan chauha hman theih turin tihdanglam a nih thu Zirtawpni liam ta khan an puang.