Miss Mizoram 2026 thlang dawn

ZONET TV Pvt Ltd chuan Mizoram Journalists' Association thawhpuiin Miss Mizoram 2026 a buatsaih leh dawn a, inbuatsaih mek a ni.

Miss Mizoram 2026-a tel duh tan January 26, 2026 atangin application form lak chhuah theih a ni dawn a, application form hi ZONET Office-ah lak chhuah theih a nih bakah, online-in lak theih a ni ang. Application form thehluh theih hun chhung hi la tihchian leh a ni ang.

District tinah District Miss thlan leh tum a ni a, District Miss te chu Miss Mizoram final contest-ah an tling nghal dawn a ni. Aizawl district-a mite tan March 4, 2026-ah Open Audition neih tum a ni a, hetah hian district danga mite tan pawh tel theih a ni.

Aizawl khawpui chhunga college hrang hrangin college miss atana an thlante chu Miss Mizoramah hian an tel duh a nih chuan direct entry pek an ni dawn a; audition-ah inlan a ngai dawn lo a, eligibility criteria an tlin ve erawh a ngai thung.

Miss Mizoram 2026 Grand Finale chu R Dengthuama Hall ah neih a ni dawn a, a hun atan April thla tawp lam tinzawn a ni.