Box Office-ah Frozen II khum thei an la awm lo
Box Office-ah thil danglam thleng a awm lo a, Frozen II ropuina belhchhaha awm zelin a zawnin kar thum sum lalut tam ber a ni ta a, Knives Out bawk pahnihna ni lehin Ford V Ferrari chu pathumna a ni leh bawk.
Frozen II a vul zel
American 3D computer-animated musical fantasy film, Walt Disney Animation Studio-in an produce, 2013-a tihchhuah Frozen chhunzawmna Frozen II ropuina belchhahin a awm zel a, chuai lam a pan thei meuh lo.
Kar tawpah khan US-ah chuan theatre 4,348 aṭangin sum $35,165,614 a la lalut thei a ni. Film lar tak tak leh huhang nei lian tak tak zingah tlangzarh kara hetiang zat sum lalut pha lo hi tam tak an awm laiin Frozen II erawh chuan kar thum a liam hnu pawhin $mtd 35 chuang a lalut thei a ni.
Khawvel puma a sum lakluh chu $mtd 922.4 a tling tawh a, $tld a lakluh phak lohna a tam tawh lo hle. He film siamna atana an budget hi $mtd 150 a ni a, an khum hneh rem rem hle bawk.
Thil danglam a thleng lo
Chart hmasaa pahnihna Knives Out bawk pahnihna ni lehin, $mtd 14 chuang a la lalut thei a, pathumnaah pawh chart hmasaa pathumna Ford v Ferrari bawk a awm leh. Top 5-ah hian thil danglam thleng engmah a awm lo a, palina pawh chart hmasa palina tho Queen & Slim ni lehin, chutiang bawkin pangnaah pawh A Beautiful Day in the Neighborhood bawk a awm ve leh.
Dark Waters a invawrh
Mark Ruffalo leh Anne Hathaway channa American legal thriller film Dark Waters hi November 22-a tlangzarh kha niin, chart hmasaah khan 16-na a ni a, tun ṭumah erawh sum lalut tam paruknaah a rawn invawrh a ni. Nathaniel Rich article ziah 'The Lawyer Who Became DuPont's Worst Nightmare' behchhana film siam hi a rawn invawrh thut a, a starring en hi chuan thil mak pawh a ni hran chuang awm lo e.
Box Office Top 10
1 Frozen II $mtd 35
2 Knives Out $mtd 14
3 Ford v Ferrari $mtd 6.65
4 Queen & Slim $mtd 6.64
5 A Beautiful Day in
the Neighborhood $mtd 5
6 Dark Waters $mtd 3.9
7 21 Bridges $mtd 2.8
8 Playing with Fire $mtd 2
9 Midway $mtd 1.9
10 Last Christmas $mtd 1