Billboard 200: Zach Bryan 'With Heaven on Top' No.1 a ni nghal

Billboard 200 album chart tharah American country singer leh songwriter ni bawk Zach Bryan album thar 'With Heaven on Top' chu tihchhuah karah No 1 a ni nghal. Bryan album thar hi a album chhuak tawh zinga album chart-a No.1 ni thei pahnihna a ni a, hla 25 awmin kar hmasa chhung khan equivalent album unit 134,000 a nei tling.

'With Heaven on Top' album hi Bryan studio album parukna a ni a, album hi streaming service huangah chauh lei theih tura tihchhuah hmasak a ni a, March-ah CD leh Vinyl variant in tihchhuah theih beisei a ni. Kar laklawhah deluxe edition accoustic track awmna tihchhuah nawn leh a nih hnuah sales hi a pun phah bawk.

Kar 13 chhung chart chungber dinhmun luah thei, kar hmasa a No.1 rawn let thar leh, Morgan Wallen album 'I' the Problem' chu pahnihnaah tlahniam ve thungin, equivalent album unit 82,000 a nei. Tun ṭum album chart No.1 leh 2-te hi kum hnih hnua country music-in an thunun lehna chiah a ni. Kum 2024 Feb 17-a Toby Keith thih vanga a album '35 Biggest Hits' No.1 a rawn nih leh khan Wallen album, 'One Thing at a Time' kha No.2-ah a awm tawh bawk a ni.

Olivia Dean album thar ber 'The Art of Loving' chu a dinhmun ngai pathumnaah la awm tluang zelin equivalent album unit 64,000 a hmuh belh leh a; Taylor Swift 'The Life of a Showgirl' chu palinah tlahniam zui zelin kar hmasa chhung khan equivalent album unit 63,000 neiin a tlakhniamna 13% a tling.

No.1 pawh lo ni tawh, KPop Demon Hunters 'Soundtrack' chu chart hmasa aia 1% a tlahniamin equivalent album unit 56,000 a nei a, Top 5 a la khar pha a ni.