Fashion Fiesta Coat & Jacket
Top Coat : Coat design hovah chuan a simple ber leh hlui thei lo bera an sawi ṭhin a ni a, a bikin mipa suit chunga hak tura duan deuh a ni a, amaherawhchu tun hnuah jeans leh T-Shirt te nena hak kawp fo anih avang hian formal lutuk lo deuh pawhin kan inbel ta ṭhin a ni.
Pea Coat : A hmei apain he Coat design hi kan ngaina tlang vek awm e. James Bond movie Sky Fall-ah khan Daniel Craig khan a rawn inbel a, a larpui hle a nih kha. He coat style lo chhuahna Lawng Sipaite inbel ṭhin chu mi nawlpui hak tura duan chhuah a ni a, a design hi casual deuhah pawh jeans te nen inbel kawp theih anih laiin smart deuh hleka inchei duh hunah pawh Biak In chhunga luhpui ngam tho a ni a, a hmei apa tan a ṭangkai ve ve.
Bomber Jacket : Indopui II-na laia US Sipai thlawhna khalh hote chuan van sanga an thlawhin boruak alo vawh deuh tawh ṭhin avangin anmahni tilum thei turin siamchhuahsak an ni a, a design leh style hi a lo ngainatawm phian a ni ang e, fashion huang chhungah lak luh niin mi nawlpui inbel theih turin, a design danglam si lovin, puanthan dang deuh aṭang ten an siam chhuak chho ta zel a, a lum ṭhain a te fel êt bawk avangin ṭhalai zingah thlasik incheina ngainat hlawh berte zinga mi a ni chho ta a ni.
Down Jacket : Puffer Coat tia sawi a ni bawk ṭhin. Puar deuh pap khawih leh deh nuam tak, a
ṭhuina thlur lang ṭhiak mai, Jacket zangkhai tak, down feathers an tih mai thunkhawm aṭanga siam Jacket hi nalh lutuk lem lo mah se a lum a, a zangkhai bawk a, chu chuan ngainatu a ngah phah a ni.
Moto Jacket : He Jacket ha tur hian Bike neih kher pawh a ṭul lem lo. A tlangpuiin leather dumah zipper buggle rivets leh studs-te a inbel deuh chuai ṭhin. Rock & Roll nena inzul tak
ṭhalai ten tunlaina atana an hman tlanglawn ber niin a hmei apain an nalh pui ve ve.
Duffel Jacket : Lazai duffel an tih mai, chhah pawr deuh hrep hrup aṭanga siam niin, a design style hi chu a ngai deuh reng a, a rawng a danglam zeuh zeuh tih loh hi chu khup chung chen vela fual, a hmaa seal chi khat, walrus an tih mai ha aṭanga siam leh hrui inthlun zawm thei, pocket chhin nei, lehlam lehlama awm ho hi duffel tiin an sawi mai ṭhin.
Trench Coat : Coat zingah chuan a lar ber pawl niin, fashion ang zawngah phei chuan hre lo kan awm awm love. Burberry Brand-in an rawn tilar em em a, sipai ho intihhlumna tura duan kha vawiina kan incheina tunlai berte zinga mi a lo ni ta a, a tlangpuiin lei rawng, a hma invuak thuah, button 10 nei, a kawnga suihna tur awm ho hi Trench Coat an ti deuh tlangpui.
Car Coat : He Coat tereuh hi chu tunlai ṭhalai ten kan uar chho mek zel a ni e. Kil li nei ang deuh tawpa langin over size jacket kan tih ang deuh chi hi a ni e.
Cocoon Coat : Car Coat nen inang viauin sawi pawlh pawh a ni fo ṭhin. Coat pian nei lo, a kâwng pawh fêk lem lo, zak in-fit thlap emaw, a bân bûl cut awm lem lo, khup chung chen a ni tlangpui.
Anorak : Tunlai ṭhalaite, a bikin Zofate heng Coat style hian min run mek zawng a ni e. Parka Jacket kan tih te nen sawi pawlh a ni fo a, a danglamna chu Anorak bik hi chu Water Proof niin lukhum nei a tlangpui a, a lukhum kual lai chu ramsa hmula siam a ni tlangpui ṭhin.
Parka : Secondhand lane kal ṭhin changtein tunlaiah na na na chuan Parka Jacket tluka
ṭhalai ten kan uar a awm awm love. A tlangpuiin vut rawng aṭanga a hring uk lam rawngkai a ni tlangpui ṭhin a, a lum ṭhain
ṭhalai leh kum upa lam deuh te pawhin kan ngaina tlang vek niin a lang. Kumin khawvawtah chuan kan inbel tlanglawn ber tur pakhat a ni ngei ang.
Tuna kan sawi tak bakah khian tam tak sawi tur pawh ala awm ngei ang. Heng ho hi mipuiina kan hriat tlanglawn niin readymade ah te a lo to uchuak deuh hlek anih pawhin secondhand-ah man man zawkin duhthusama mawi leh nalh tak tak lei turin a awm tih kha hria ila.
Tluangpuii Hmar
Instructress
Vakiria Institute of
Fashion Technology